God oppslutning på Hareid Vekst sitt første frukostmøte
Om lag 50 deltakarar møtte opp då Hareid Vekst inviterte til sitt første frukostmøte hos Millennium Cowork. Morgonen baud på både nettverksbygging, fagleg påfyll og gode samtalar mellom næringslivsaktørar frå Hareid og regionen elles.
Tema for møtet var aktuelle rammevilkår for næringslivet, med særleg fokus på statsbudsjettet, skattereform og den politiske situasjonen fram mot lokalvalet neste år. Deltakarane fekk høyre innlegg frå Fredric Holen Bjørdal, banksjef for næringsliv i SpareBank 1 SMN, Ingvild Vartdal og Runar Nordby Johnsen frå ADVISO Advokatfirma, og Bjarte Folkestad frå Høgskulen i Volda. Innleiarane delte innsikt og perspektiv knytt til økonomiske utsikter, skattepolitikk og samfunnsutvikling, og la grunnlag for fleire gode diskusjonar gjennom morgonen.
Frukostmøtet vart denne gongen arrangert i godt samarbeid med SpareBank 1 SMN. I tida framover vil Hareid Vekst invitere til fleire frukostmøte med relevante tema. Målet er å skape møteplassar der næringslivet kan byggje nettverk, dele erfaringar og få tilgang til relevant kunnskap om tema som påverkar bedriftene i kvardagen.
Det gode oppmøtet viser at interessa for slike arenaer er stor. Hareid Vekst ser fram til å invitere til fleire frukostmøte og møteplassar for næringslivet i tida framover.
