Pressemelding: Samarbeidsavtale med Næringsforeninga

Hareid Vekst og Næringsforeninga i Ålesundsregionen har inngått ein samarbeidsavtale for å styrke næringsutviklinga og verdiskapinga i regionen. Avtalen legg til rette for tettare samarbeid, fleire møteplassar og auka verdi for medlemsbedriftene.

Adm. direktør i Næringsforeninga, Heidi Nakken, og dagleg leiar i Hareid Vekst, Christine Erdal

Næringslivet på Sunnmøre er del av ein felles bu- og arbeidsmarknad der kompetanse, arbeidskraft og verdikjeder går på tvers av kommunegrensene. Både Hareid Vekst og Næringsforeninga i Ålesundsregionen ser derfor stor verdi i å byggje sterkare band mellom lokale næringsmiljø og dei regionale nettverka.

Gjennom avtalen får medlemsbedriftene betre tilgang til faglege møteplassar, nettverksbygging, kompetanseutvikling og relevante arrangement. Samarbeidet skal også gi fleire moglegheiter for å knyte kontakt med potensielle kundar, samarbeidspartnarar og leverandørar, samtidig som næringslivet får ei sterkare stemme i saker som påverkar rammevilkår, samferdsel, kompetanse og regional utvikling.

– Skal vi lukkast med å skape vekst og utvikling i regionen, må vi arbeide tettare saman. Denne avtalen gir bedriftene våre tilgang til eit større nettverk og fleire moglegheiter, samtidig som vi kan løfte fram dei kvalitetane og ressursane som finst i heile regionen, seier Christine Erdal, dagleg leiar i Hareid Vekst.

Dei to organisasjonane meiner at samarbeid er avgjerande for å møte framtidige utfordringar knytt til rekruttering, kompetanse og konkurransekraft.

– Næringslivet står sterkast når vi samarbeider. Gjennom denne avtalen styrkjer vi koplingane mellom bedrifter, kompetansemiljø og næringsaktørar, noko som gir verdi både for medlemsbedriftene og for utviklinga av regionen som heilskap, seier Heidi Nakken, administrerande direktør i Næringsforeningen i Ålesundsregionen.

Målet med avtalen er å skape fleire moglegheiter for næringslivet, styrkje regionen si attraktivitet som bu- og arbeidsstad og bidra til vidare vekst og verdiskaping på Sunnmøre.